Comisiones Obreras - FSC Galicia

xoves 27 de abril de 2017

CCOO aplaude a decisión do Colexio de Xornalistas de lle outorgar o amparo a un profesional da TVG que denunciou manipulación

• O organismo colexial considera que os superiores deste xornalista menoscabaron os seus dereitos ao manipularen unha noticia e que, ademais, comprometeron a súa dignidade e imaxe profesional

O sector de medios de comunicación de Comisións Obreiras de Galicia e a sección sindical de CCOO no ente público aplauden a decisión do Colexio de Xornalistas de lle outorgar amparo a un profesional da Televisión de Galicia (TVG) que denunciara a emisión dunha noticia súa, pero manipulada.

O Colexio de Xornalistas outorga o amparo a un profesional da TVG que denunciou manipulación

O organismo colexial considera que os superiores deste xornalista menoscabaron os seus dereitos ao manipularen unha noticia e que, ademais, comprometeron a súa dignidade e imaxe profesional.

Desde CCOO consideran «triste» ter que chegar ao punto de que o órgano profesional dos xornalistas de Galicia inste a compañía pública a cumprir cos principios de pluralidade política, ideolóxica, cultural e social, amais de obrigar a respectar a profesionalidade dos xornalistas e a credibilidade dos contidos informativos.

A comezos de marzo, Luís Quintas, un redactor de longa traxectoria e recoñecido prestixio, elaborou unha peza informativa sobre o cultivo de ostras en Galicia, baseada en entrevistas realizadas na Universidade de Santiago a un equipo de investigación en acuicultura. Despois preparou esta información para o programa Galicia Noticias Mediodía. Na edición da tarde, Galicia Noticias Serán, a nova quedou «mutilada», pero mantívose a voz en off do autor.

Segundo CCOO, con esta mutilación pretendíase evitar que a audiencia escoitase a declaración dun técnico que criticaba a actitude do Goberno autonómico na cría e cultivo de moluscos en Galicia. Ese técnico dicía que a Xunta está desaparecida na atención e explicaba o porqué en 22 segundos de intervención. Tamén foi suprimido o parágrafo final da noticia, que dicía: «este especialista en cultivo de moluscos afirma que á Xunta non lle interesa aumentar a produción destas especies e lembra que nas depuradoras galegas predomina o marisco foráneo».

A TVG incumpriu as súas obrigas

Unha vez investigados os feitos denunciados, o que incluíu entrevistas coas partes interesadas, a Xunta de Goberno do Colexio Profesional de Xornalistas de Galicia (CPXG) «entende que os superiores de Quintas, redactor da TVG, menoscabaron os dereitos que o asisten como xornalista», xa que, coa propia voz do afectado, emitiuse unha «noticia que fora mutilada sen o previo consentimento do autor».

O CPXG coida que con este feito a TVG «incumpriu a súa obriga de ofrecer unha información veraz e completa», o cal «dana a credibilidade» do medio de comunicación público. O escrito do organismo profesional non coida cribles as explicacións fornecidas pola dirección da televisión pública, que defendía o recorte da noticia por ser «demasiado longa», pois o único que se suprimiu da información foron as críticas á Xunta de Galicia.

O Colexio lamenta que a manipulación da información tamén compromete a «dignidade e imaxe profesional» do xornalista, cuxa voz acompañou a noticia. «Ningún xornalista pode ser obrigado a asinar unha información contra a súa vontade», incide o CPXG, e neste caso a peza emitida pola TVG «desvirtuaba de xeito substancial o traballo de Quintas».

Cómpre crear comités de redacción nos medios públicos

CCOO aplaude que o CPXG inclúa no seu escrito de amparo a necesidade de crear comités de redacción na televisión e na radio públicas, órganos profesionais que, a xuízo do Colexio, evitarían «que os xornalistas fiquen indefensos ante calquera decisión arbitraria que afecte ao contido do seu traballo».

Recomendar

Versión para imprimir

Documentos relacionados

nota prensa

Áreas temáticas relacionadas

Actualidade - Sindical - Actualidad

Para ver a información asociada é necesario ter instalado o programa Adobe Reader

Podes descargalo na seguinte ligazón